في يوم من الأيام كنت اتكسف افرح
وفي ظلم وحصار لإخواني هنا وهناك
وأقول انا إزاي انبسط وأمرح
وأخويا هناك بينام على الدم والأشواك
***********
يوم ضرب بغداد أنا لسه فاكره تمام
كأنه من أسابيع، كأنه من أيام
كان عندنا في البيت حلوى وجاتوه يا سلام
خدت منها قطعة وفتحت قناة النيل
لقيت البارود أمطار لقيت الدماء بتسيل
سمعت أصوات قنابل بعدها أصوات عويل
ياترى ده صوت أم بتبكي على ابنها
إللي في لحظة الغدر خطفه من حضنها
لقيت الحلوى في فمي سكرها راح منها
يارب حسبنا أنت وأنت نعم الوكيل
********
أنا مش بقول حدوتة، لكن بقول عشان
نشوف في كام سنة إيه اللي جرى وكان
كام سنة مروا في عمر التاريخ لا شيء
لكن أثرهم علينا كان أثر أزمان
********
مش هحكي عن مرحلة عيني ماشفتهاش
تقدر تسأل عليها اللي شاف وعاش
أيام ما كانت العرب كلها بتحارب
بحق ولا بباطل كان ما بيهمهاش
*******
أما عني فشوفت لأمتي 3 حالات
لما تسمع للمسلمين أصوات صريخ وآهات
أولها كانت الحزن والغضب والغيظ
وضيق وغم ودعاء وقنوت وتبرعات
وتلاقي الناس بتحكي وبتسمع النشرة
وتقعد قدام "الأولى" من تسعة لحد عشرة
ولا كان فيه "جزيرة" و"عربية" ولا صراعات
ولا "أصلهم بيكرهونا" ولا "دول بتوع حركات"
ومكنش فيه تحرك ، لكن كان باقي روح
كان باقي لسه حزن وإحساس وألم وجروح
ألم يولد أمل إن المارد يفوق
وورود بساتين الوحدة ترجع عطورها تفوح
*******
وللأسف هلت علينا مرحلة من بعدها
كره المارد جروحه وزهق بقى منها
لكن بدل العلاج راح يقتل الإحساس
ويشوف بقى أكل عيشه زي بقيت الناس
وانشغل بغذا جسمه عن روحه المهدودة
ويدورعن الترف وعن الجنة الموعودة
وليه أشوف النشرة مادام "روتانا" موجودة
هنكد على نفسي ليه ده أنا طول النهار شقيان
هبقى أجيب النشرة لما يعيدوا الأجوان
مساكين والله إخواننا المظلومين في كل مكان
لكن حزني لا هيداوي ولا هيكسي العريان
********
ودلوقتي إحنا بنعيش المرحلة التالتة
اللي بجد حكاية، اللي بجد فلتة
ما اظنش إن العدو نفسه اتمناها في يوم
بدل مساندة أخويا يكون منه الهجوم
لا أنا هحزن عليك ولا حتى هكون في صمت
تستاهل اللي بيحصل منبوذ مكان ما كنت
هتقولي طيب ليه؟ هقولك هو كده
الجرايد والدش قالولي إنك أعدى العدا
وأنا بحترم الإعلام
وبسمع الكلام
وهشوف الفيلم وأنام
وأوعى تجيلي في الأحلام
مالكش فيها مكان
بدل الفولاذي هتلاقي
دنيا متحكمة
*******
ياللي في يوم كنت أخويا مستغرب مني ليه؟
ده حب الدنيا إللي رسولنا قال عليه
شوفت كل ما يزيد في قلوبنا بيعمل فينا إيه؟
ليست هناك تعليقات:
إرسال تعليق