لو سألوكي عني يا أرض
هتقولي إيه؟
لو سألوكي عن مشيتي
عن نظرتي
عن كلمتي
عن سكوتي
******
لو سألوكي عن ضحكتي
عن دمعتي
عن صرختي
بعلو صوتي
******
لو سألوكي عن جبهتي
وهي بتحضنك في سجدتي
لو سألوكي عن المعاصي
عن المآسي
لو سألوكي إزاي ومنين
كسبت مالي وقوتي
******
لو سألوكي هتحزني
لما يلبس الكفن
وفي بطنك يصيبه العفن
ولا يا ترى هتفرحي
وتضحكي وتمرحي
أخيرا الظالم اتدفن
******
ولا حياته عندك زي موته
وكلامه عندك زي سكوته
طب قولولي إزاي هسمع له صوت
ده من يوم ميلاده لحد الموت
ركب الموجة مكان ما تروح
في وسط القطيع يقول براحته
لكن لوحده
صوته مبحوح
******
لا فاكرة له موقف ولا حتى كلمة
دبح وجوده بسكينة تلمة
أكل وشرب وإتجوز ومات
عاش من سكات ومات من سكات
يمين ماشي ، شمال عادي
أصله ابن حلال وطيب وهادي
لو سألوكي قولي ولادي
ولد مؤمن
وولد ظالم
وأكتر ولادي ، الشاب عادي
ليست هناك تعليقات:
إرسال تعليق